Handa na ba kayo? Robredo ilalabas sa publiko ang drug war reports na ayaw basahin ni Duterte

Bise President Leni Robredo / larawan mula sa Philstar

Ipapaalam na ni Bise Presidente Leni Robredo sa publiko kung ano ang kanyang mga natuklasan tungkol sa giyera ng gobyerno laban sa illegal drugs sa maikling panahon na siya ay naging co-chairperson ng Inter-Agency on Anti-Illegal Drugs (ICAD).

Ayon kay Robredo, ang kanyang mga natuklasan at rekomendasyon para ma-improve ang kampanya laban sa droga ay nakapaloob sa dalawang ulat na isinumite niya kay Pangulong Rodrigo Duterte.

“Iyong first two reports ko saka recommendations, sa kaniya ko sina-submit. Pero sabi ni Sec. Panelo, hindi naman binasa. So iyong sa akin, baka mas mabuti, public, para for whatever it is worth, ma-consider,” ani Robredo sa kanyang programa sa radyo.

Sinabi ni Robredo, ang kanyang opisina ay nag-draft din ng pangatlong report tungkol sa giyera laban sa droga ngunit hindi na niya naisumite sa Malacanang matapos siyang patalsikin ng pangulo.

Ani Robredo, ilalabas niya ang naturang ulat pagkatapos ng 2019 SEA Games 2019.

Nauna nang hinamon ni Duterte si Robredo na ibahagi ang kanyang natuklasan tungkol sa giyera laban sa droga, sinabihan  din ng Pangulo ang Bise President na ginawa niyang "assh * le" ng kanyang sarili sa 19 na araw na siya ang naging bahagi ng ICAD.

Sinabi naman ni Robredo na hindi niya alam kung bakit ang administrasyon ay tila “natatakot” sa mga posibilidad na kanyang isasapubliko ang kanyang mga nalaman.

“Sa kanila, iyong dating, parang tinatakot? Eh bakit… bakit? Eh talaga namang may matutuklasan ako kasi nilagay ako diyan, mayroon akong trabaho, at iyong trabaho ko talaga gawing mabuti iyong mga hindi mabuti,” ayon kay Robredo

Source: Politiko